Die letschte Wuche mit uesem Auto...

Blick uf Coyhaique

Nochdem mir ueses Auto bim Mech in Coyhaique uf Vordermann brocht hend, sind mir fascht wie uf rohe Eier uf de Caratera Austral wieters noch Norde gfhare. Mir hend ues fescht vorgno, jetzt nuet meh z'riskiere, so churz vor em Autoverchauf. Uesen Vorsatz het genau 3 Stunde aneghebed, denn hend mir ues bim Versuech en schoene Schlofplatz z'finde hoffnigslos igrabe!






Bi jedem neue Versuech sind mir nochli meh im Dreck gstande, so dass mir hend muesse igseh, dass mir ohni Hilf nie meh usechoemed. Bloederwies isch de schoeni Platz sooo abglege gsi, dass mir noed hend choene mit Hilf vo verbifahrende Autos rechne. Zum Glueck hets es paar Kilometer nebedra es paar Huesli gha.

Chilenischi Helfer

Det acho hend mir mit Winke es aelters Paerli uf ues ufmerksam gmacht und ihne uesi Situation erklaert. Ohni z'zoegere het sich das chilenische Paerli is Auto gsetzt und isch ues cho go helfe. Leider hend sie ihren 4x4 Jeep d'Wuche zuvor verchauft und ihri Camioneta het z'wenig Pfupf fuer uesen noed gad liechte Dodgie gha.. S'Resultat noch zwei Stund isch bedrueckend gsi: Mir sind no viel beschissner det gstande wie vorher. Frustriert hend mir denn d'Nacht i uesem Zelt verbrocht, do s'Auto so schraeg gstande isch, dass mer nuemme het choene drin schlofe.

Am andere Tag hend mir denn schnell festgestellt, dass es nur ei Moeglichkeit git, us dem Schlamassel wieder usezcho: Grabe, grabe, grabe..

Muchas gracias por su ayuda

Und das hend mir denn au gmacht. Noch sechs Stund grabe und 2 Stund Bretter underlege und useziehe, isch de Dodgie ohni Chratzer und Buele wieder ade Stross gstande! Dreckig, mued aber z'friede sind mir zu dem hilfbereite Paerli gange, wo mir ihri Duschi hend doerfe benutze. Jo, und wo mir mit Dusche fertig gsi sind, isch au gad scho de Znacht dete gstande! Bis tuef id d'Nacht inne hend mir ues underhalte und sind denn voellig kaputt go pfuse. Am andere Morge hend mir ues nomel welle bedanke und denn wieter fahre. Aber nuet do, de zmorge isch scho uf em Tisch gsi! Mir sind so richtig verwoehnt worde und hend gar noed gwuesst, wie mir ues fuer die Hilf choend bedanke. Zum Glueck het de Kai no es neus Schwizer-Sackmesser debi gha, wo bi dere Glegeheit en neue Bsitzer gfunde het :-)

Mit chli Liem gseht das scho wieder ganz guet us..

Ufgstellt vo dem guete End vo uesere Autovergrabigsaktion, sind mir wieters Richtig Norde gfahre. Es isch noed lang gange, do isch d'Stross eng, holprig und loechrig worde. Wo mir denn um d'Kurve hend welle, chunt ues en Lastwage entgege, wo sis Fahrzueg leider gar noed im Griff gha het..Obwohl er im Zietlupetempo a ues verbi gfahre isch und de Kai ghuped het, het er s'gschafft uesen Dodgie z'ramme! Mir hend gmeint mir bechomed d'Krise, wo mir gseh hend, was er agstellt het. Aber richtig haessig sind mir worde, wo sich de guet Kerl eifach us em Staub gmacht het!

Uf de Caratera Austral.

ebefalls uf de Caratera Austral

ueberall hets bluehendi Blueme ge

Mir hend nur no noch El Bolson in Argentinie welle und det s'Auto uf en Camping stelle, so dass mer aschluessend nur no noch Buenos Aires muend fahre..Zu allem ane hets au no agfange regne und die eigentlich schoen Ussicht isch Wort woertlich is Wasser gheit.

Voll duregschuettlet sind mir noch eme muehsame Grenzuebergang am obig in El Bolson acho. Uf em Weg zumene Camping isch es denn passiert, uesi Rotula (sorry, kei Ahnig was das uf duetsch heisst) isch broche und mir hend gad no choene an Strosserand fahre. Zu allem Uebel hets immer no gseicht wie bloed, es isch dunkel worde und es het kein verfuegbare Abschleppdienscht geh, wos mit em Kampfgwicht vom Dodgie het choene ufneh..Irgendwenn isch denn Hilf i Form vo zwei ufgstellte Argentinier cho, wo under s'Rad e Art Skateboard gschnallt hend, so dass mir wenigstens hend choene ufere Parknische uebernachte und noed halbe ide Chruetzig ine.

d Fuehrerkabine vom Abschlepper hets gad gluepft bi dem Gwicht

Voellig fruschtriert hend mir d'Nacht det verbrocht und ues de Chopf zerbroche, wie mir das in Griff bechoemed. Vor allem will ues bewusst gsi isch, dass das mit de Ersatzteil fuer ueses Auto so e Sach isch..Am andere Tag hend mir ues uf gmacht um Ersatzteil z'organisiere. Do mir kei Stadtcharte gha hend, sind mir zerscht Mol is Turibuero. Und denn isch es los gange: Die Frau det het allne moegliche Gschaefter agluetet, um z'froge, obs die Ersatzteil git. En Argentinier, wo selber amel mit sim Wohnmobil underwegs isch, het s'Gspoech mitbecho, het ues churzerhand i sis Auto verfrachtet und ues zume gute Mech brocht. De wiederum het in es paar Minute en Abschlepper gha, so dass s'Auto e Stund spoeter ide Garage gsi isch. Mir hends fascht noed choene glaube, aber am Obig isch de Dodgie wieder gloffe!

Bergchetti bi el Bolson

Die noechschte Taeg hend mir denn bim schoenschte Wetter uf eme Camping in El Bolson verbrocht, wo mir au nomel de Artesaniamarkt bsuecht hend und nomel s'eint oder s'ander poeschtelet hend. De Schlag het ues denn erscht troffe, als mir denn mol ueses Zueg zaemme packt hend zum luege, oeb au alles id Tramper wuer ine passe, oder ob mir no was muessted Hei schicke. Aber alles staple, quetsche und wuerge het nuet brocht, oeppe 10 kg Material hend eifach nuemme inewelle. Do het au am Kai sis Raumwunder vomene Rucksack nuet brocht. De Zuefall hets welle, dass mir denn das noed gad liechti Paeckli mit dem ganze Zuegs hend choene amene schwitzer Paerli mitgeh, wo mit em Schiff zrug id Schwitz goht..

Uesen haengige Stellplatz.

Noch ere Wuche in el Bolson hend mir Bsuech vom Maeck, de Carin und em Noe becho, wo mir vor es paar Moenet kenneglernt hend. Zaemme hend mir e super Wuche uf eme abglegne Camping verbrocht, wo gad am Fluss glaege isch. Jede Obig hets Fleisch geh und mir hend die letschi Ziet mit uesem Auto i gueter Gsellschaft nomel so richtig gnosse.

Cabeza del Indio

Wie lang gohts bis er iegheit?

Glichgwichtstraining

Das waer jetz ebe d Rotula.

Noch dere Wuche isch es denn aber ernscht worde, uesen Auto-Chaeufer isch mit Sack und Pack in Buenos Aires acho und het uf s'Auto gwartet. Damit mir au puenktlich det sind und glich noed muend stresse, hend mir wohl oder uebel muesse ufbreche. Mir sind kei 60km gfahre, do hend mir erneut es Problem mit uesere Rotula gha! Es isch echt zum Verzwiefle gsi! Gottseidank isch das ganze anere Hauptstross passiert und mir hend choene Hilf oganisiere.




                                                                                       

Andrea-Manu-Nataly

In Bariloche hend mir die ganz Familie, wo ues ueber Stunde gholfe het, welle als Dankeschoen zumene Drink oder zum z'Nachtesse ilade, aber de Cristian het zerscht no welle bi Kollege under Duschi stoh. Churzum sind mir alli zaemme zu sine Kollege gfahre, wo mir denn au alli zum z'Nacht iglade worde sind. So sind mir denn selber dijenige gsi, wo iglade worde sind, obwohl mir das gad umgekehr hend welle. Mir hend en superluschtige Obig erlebt und sind denn am andere Tag guetglunt und voller Elan noch Bunoes Aires ufbroche.

underwegs noch Buenos Aires

 

Buenos Aires

Tango in San Telmo

Je noecher mir a die riese Stadt anecho sind, desto heisser und fuechter isch es worde. Noch drue Taeg hend mir ueses Ziel erreicht und hend endlich de neu Eigetuemer vom Dodgie mit sinere Familie kenneglernt. Do es sich um superzwaegi Luet ghandlet het, isch ues de Autoverkauf au nuemm ganz so schwer gfalle..
Mir hoffet, dass de Oli und sini Familie genau soviel Freud werdet ha wie mir ka hend uf uesere Reis, isch eifach es cools Auto..... 

Letschts Foti mit "uesem" Dodgie

Fuer ues isch es denn wieters noch Uruguay. Es isch scho chli komisch gsi, wieder mit em Rucksack uf em Rugge e Hotel z'sueche..Mir sind aber schnell fuendig worde und mir hend ues i dere Backbackerwelt au gad wieder heimisch gfuehlt.

Rio Plata

Colonia

                                                                         
Jo, und jetzt sind mir do, am Ufer vom Rio Plata, wo zwor noed so zum Bade iladet, defuer aber Feriestimmig vermittlet. Staedtli isch chli, kolonial und noch Buneos Aires richtig schoen ruhig..Morn gohts denn wieters anen Strand, wo gnau wuessed mir au nonig und denn gohts langsam aber sicher Hei zue..Es Ruecflugticked hend mir zwor nonig, aber das wird sich ide noechschte Wuche aendere, denn mir denked, dass mir im Maerz Hei cho werdet..Bis es so wiet isch, gnuessed mir nochli d'Straend vo Uruguay und Brasilie und hoffed, dass es ide Schwitz au chli waermer wird :-)

Colonia

Macheds guet und fruehred eu d'Ohre noed ab!

Saludos de Colonia

Kai und Manu