Noch unvorstellbare drue Moenet in Ecuador, hends mirs denn schlussendlich glich no noch Peru gschafft!! In Ecuador sind mir, nochdem mir in Tena sind go raffte, noch Vilcabamba zum Usklinge vo dem schoene Land gange. Mir hend i dere traumhafte Berglandschaft superfeins Esse gnosse und de eint oder ander Spaziergang underno. Als Belohnig hets denn e Koerpermassage vo 75 Minute geh, wo ganzi 18 Dollar koschtet het :-)
 |
| Geburtstagsraffte |
 |
| Vilcabamba |
 |
| Die letschte Meter |
Mir sind denn vo Vilcabamba i zwei Taeg direkt ad Grenze gfahre, wo mir en witzige und sehr unkomplizierte Grenzuebergang gha hend. Als erschts Ziel hend mir Mancora, es Skitesurferparadies, apeilt. De Strand isch eher en riese Sandhufe gsi, wo am Meer liet. Mir hend det de Markus, wo mir schomol in Kolumbie troffe hend, wieder troffe und hend super gueti Tipps fuer Peru becho. Danke vielmol!!!
 |
| Entlang de Kueschte |
De Kueschte entlang isch es dur e Wueschtelandschaft noch Huanchaco, es chlieses aber turistisches Ort, gange. De Weg isch so eintoenig gsi und Stross so grad, dass am Strosserand sogar Kurve ageh hend ..
Dos ade Kueschte langsam neblig wird, sind mir denn gli wieters Richtig Berge!
 |
| Huanchaco |
Zerscht sind mir de Canon del Pato (Enteschlucht) gfahre und hend die schoen Felslandschaft richtig i ues ufgsoche. Mir sind denn i de beruehmte Cordelliera Blanca glandet und hend ues umgeh vo schneeebedeckte Berge wieder gfunde. Noch afaengliche Schwierigkeite en guete Stellplatz zfinde, hend mir denn schlussendlich s grosse Los zoge!
 |
| Entenschlucht |
 |
| Obiglichi Ussicht i de Way Inn Lodge |
Mir sind uf 3710m i de Way Inn Lodge glandet, wo eigentlich zue gsi waer. Aber die zwei coole, junge Voluntaere Dan und Boris, hend ues anschienend sympatisch gfunde und hend ues glich ufgno. Mir sind so e chline aber cooli internationali Gruppe gsi, wo e Hammer Ziet gha het! Damits chli guenstiger gsi isch, hend mir ab und zue selber kochet. S eint oder s ander Feschtli, mit em peruanische Getraenk Pisco, het scho au muesse si! Anstatt wie plant zwei Naecht, sind mir den acht bliebe!
 |
| Freudesjump uf 4500m |
Damit mir noed iroschtet, hend mir au es paar Wanderige undernoh. Bi dere Hoechi isch das au ziemli astrengend gsi, aber d Usicht het ues fuer alli Bemuehige belohnt!
 |
| Steiwald |
Durch Berge dure isch es denn wieters gange. Mir sind durch unturistischi, sehr typischi Bergdoerfer gfahre und hend mit de offeherzige und liebenswuerdige Peruaner de eint oder ander Kontakt gha.
Noch drue Taeg Fahrt sind mir denn uf ueber 4200m bim Bosque de Piedra (Steiwald) acho. Det hets ues oeppe Mol chli de Atem gno: vo de Hoechi, de Ussicht, de Steifigure und noed z letscht vo de Chaelti! Jo liebi Daheimbliebene, Suedamerika chan verdammt chalt si! Am Morge gsehnd mir amigs sogar uesen Atem ide Luft und ide Nacht fruehred mir ues regelmaessig eis ab!
 |
| Obigstimmig uf 4300m |
Geschter sind mir noch ere nerveufriebendere Fahrt in Lima acho. Noch ere zweistuendige Irrfahrt dur die Stadt (ohni GPS und ohni richtigi Stadtcharte), hend mir denn es guets Hostal im schoene Stadtteil Miraflores gfunde. Jo, und jetzt sind mir do, gnuessed de Trubel do und freuet ues aber scho wieder ufs schoene Wetter und uf die unturistisch Gegend wo mir uf em Weg noch Cusco werdet ha!
I dem Sinn:
Gnuessed die warme Sunnestrahle ide Schwitz und danke fuer all die chline Lebeszeiche wo mir vo uesne Leser becho hend! Und jo, ihr doerfed au uf de Blogg schriebe :-)
Hasta luego!
Kai und Manu
PS: Fuer all die wo ueses Ziel (Patagonie) kenned und mitgrechned hend: ihr hend Recht, mir moeged niemols bis im September det ane. Us dem Grund choemet mir das Johr sicher nonig Hai :-)
