KA´NU

Mittwoch, 21. März 2012

Endlich wieder de Hei!

Mir hends gschafft, noch all dene gewaltige Laender isch es denn bescheide is chlinschte, defuer s'Schoenschti, vo allne zrug gange: d 'Schwitz! Aber s'Heicho hend mir ues denn schono e chli muesse verdiene, denn ganz so glatt gloffe isch es denn glich noed :-)

Uesen letschte Obig hend mir ganz romantisch ide "Hotelbar" vo uesere letschte Abstiege gfiered, dos use go bim Dunkle so e Sach gsi isch in Sao Paulo. So hend mir denn zwei Cuba libre gschluerft, denn das, so hend mir glernt, isch s einzig Getraenk wo mer nuet chan falsche mache als Barkeeper.

Noch es paar wenige Stuendli Schlof sind mir denn am morge am 5i ufgtande, damit mir uf kein Fall uesen Flug verpassed. Mit em Taxi isch es im Affezah an Flughafe gange wo mir, wie chans au andersch sie, viel z frueh acho sind. Noch stundelangem Warte und noed druss cho wos anegoht, hend mir denn ueberascht feschtgstellt, dass uesen Flug scho azeiget wird und mir langsam aber sicher uesi Boardingcharte soettet go hole. Nur wo, isch d'Frog gsi! Ueberascht und scho fascht im Stress hend mir denn festgstellt, dass de Flughafe no en undere Stock het!

Endlich im Flugzueg, isch es denn au ziemli gad los gange. I vier Stund isch es noch Recife gange, wo mir glaub die schnellschti Landig ever gha hend. Churze Landebahn sei Dank! Froh wieder feschte Bode under de Fuess zha, hend mir de schoeni Flughafe i Augeschieh gno. Aeh rechti Wohltat noch dere Haesslichkeit in Sao Paulo! Und s'bescht isch gsi: es het massehaft Laede gha und mir no es paar verquetschti Reales zum Verpulvere! Das natuerlich zum Leidwese vom Kai :-)

Noch sorgfaeltige Inspektion vo de Laede, hend mir denn denkt, es macht meh Sinn, mit em Geldverpulvere z warte, bis mir i de Dutyfree-Zone sind. Da het e Sinn gmacht, do mir scho 2 Stund vor am Abflueg ues dur Passkontrolle hend muesse begeh. Wie gross isch denn d'Entueschig bi de Manu, d'Erliechterig bim Kai, gsi, wos genau zwei Laede gha het..Und die hend au nur Ramsch im Agebot gha!!!!

Endlich isch es denn is Flugzueg gange und ich han mi det gad heimisch gfuehlt als Lehrerin: im Flugzueg hets soviel Chind gha, dass mer dere Aglegeheit au s'Fluegendi Klassezimmer het choene saege :-) Noch ere dementsprechende churze Nacht, hets denn z'morge geh, nur bloed dass es fuer ueses Zietgfuehl faengs morge am zwei gsi isch..

Mit 30 Minute verspoetig, sind mir denn noch 10 Stund in Frankfurt acho! Somit isch de Run uf de noechschti Flug eroeffnet gsi! Ues isch genau no e halb Stund bliebe, de letschti Vogel z'verwuetsche! Bloed nur, dass mit uf em Gate C ganz am Schluss acho sind und uesen Flug uf em Gate A ganz am Afangs gange isch und Frankfurt sich bim Bau vo dem Flughafe noed bescheide zeigt het! Noch eme profihafte Sprint dur all die Luet dure isch ueses Tempo radikal abegfahre worde, wo mir wieder anere Pass- und Gepaeckkontrolle acho sind! Mir hend gmeint mir gsehnd noed recht, denn das hend mir jo scho alles hinder ues gha! Wenigschtens hends ues ade Warteschlange verbigwunke, so dass mir gad hend choene ane. Super, es langed glich no, hend mir denkt! Do hend mir d Rechnig aber ohni das netti Paerli vor ues gmacht..Mir hend uesne Auge noed traut, wo die agfange hend ihres Zueg id Chorbli zlege! Zum eine isch d Lady so mit Schmuck behaengt gsi, dass en Chrischtbaum gad iversuechtig worde waer, zum andere hends so viel elektronischi Graet debi gha, dass de Mediamarkt au choent ipacke..Nochs dem denn ihri 7 (!) Choerbli gfuellt hend, und mir scho es end vom Warte gseh hend, het natuerlich no muesse de Pipser abgo, wo d'Madame dur de Detektor dure isch..De Pelz, wo sie au no debi gha het, het die ganz Aglegeheit noed gad beschleuniged..

Endlich hend mir denn de letschti Kilometer choene i Agriff neh. 5 Minute vor de Flug gange isch, sind mir denn user Atem bi uesem Gate acho! Nur, det isch leider niemer meh ume gsi! Ganz fruendlich hends ues denn ufgforderet zum Umbuechigsschalter zgoh und uesi Situation z'schlidere, was mir denn, noed allzu fruendlich, gmacht hend...De Schalter isch natuerlich au noed gad nebed dra gsi, so dass mir ues uf em Weg det ane au wieder hend choen abrege.. Noch tussige Telefon isch s'Wunder denn vollbrocht gsi: Mir hend Tickets fuer de noechscht Flug ide Hand gha! Will de gad 10 Minute spoeter gange isch, hets denn wiedermol gheisse: auf die Plaezte, fertig, los!!

Noch dere eher unfreiwilige Morgegymnastik isch es denn zum letschte Mol id Luft gange. Was fuer es schoens Gfuehl, ueses Land vo obe z bewundere! D'Berge sind ues noch de Ande z wor chli chli vor cho, defuer het de vieli Schnee im Kai sine Fuess es Snowboardchribbele usgloest.

Endlich sind mir noch fascht 24 Stund reise in Zueri glandet! Schnell isch mer bi de Gepaeckusgob gsi um feschtzstelle, dass es noed so schnell die letschte Kilometer zruggleit het wie mir...Nochdem mir de Fall denn gmolde hend, d'Suechi igleitet worde und de Raport gschriebe gsi isch, hets kei sHalte meh geh! Endlich, endlich hend mir noech einehalb Johr uesi Liebschte wieder doerfe id Arme neh! Gross isch d Wiedersehensfreud gsi und mer het sich noed gnueg choene umarme..!

Noch eme familiere Brunsch bi de Manu ihrne Eltere ( s'Bescht Esse sit Ewigkeite!), isch es denn i ueses momentane Dihei in Oberegg gange. Voellig erschoepft hend mir denn de Luxus vonere subere, warme Duschi mit viel Wasser chone gnuesse und mit de Hilf vom Tom und de Nina hets au frischi Chleider geh. Es isch echt scho ungwohnt gsi, wieder Mol Chleidigsstueck ohni Loch und Verfearbig azha :-)

Frisch dusched und gluecklich drueber, wieder de Hei zsi, hend mir ues chli welle ufs Ohr haue. Das seg noed so e gueti Idee, hets gheisse, es chaemed no zwei drue Kollege verbi, mir soelled besser mit Schlofe nochli warte.
Gspannt, wer das au soell si, sind mir denn en Stock tuefer id Tom's Bar gsesse. Mir hend uesne Auge noed traut, wo denn uesen ganze Fruendeskreis, gspickt mit Familymitglieder, uftaucht isch!!! Mit somene Empfang hend mir echt noed grechnet! Danke viel, viel mol fuer alles!!! Ihr hends gschafft, dass s groeschti Highlight uf dere Reis s'Heicho worde isch!DANKE!!!

D'Muedigkeit isch uf eimol verfloge gsi. Am Raphi sis selberbraute Bier het de Durscht gloescht und am Tom sis feini Esse wieter Energie zum Fiere glieferet! Und gfiered, das hend mir! Am morge am drue isch es denn voellig erschoeft aber gluecklich definitiv is Bett gange..Wie's ues am morge nocher gange isch, aeh jo, das loend mir glaub lieber us :-)

Jep, somit isch s'End vo uesere Reis gschriebe. Aber wie seit mer so schoen:

Noch de Reis isch vor de Reis :-)

Muchas Gracias a alli, wo uesen Blog mitverfolgt hend und so a uesere Reis teilgno hend!

Hasta luego y saludos de Suiza!

Kai und Manu

Donnerstag, 8. März 2012

De Schluss vo de Reis

Es isch chum zum Glaube, aber de letschi Tag vo uesere Reis isch do. Zur Ziet befindet mir ues ide Monschterstadt Sao Paulo und mir sind meh als froh, wenn mir vo do vereise choend!

19 Millione Stadt Sao Paulo

Noch Colonia isch es denn zerscht noch Monte Video, de Hauptsadt vo Uruguay. Mir hend det zwei Taeg verbrocht, bis es denn definitiv an Strand gange isch. In La Paloma hend mir ues fuer 10 Taeg es Cabana goent, wo immene Eukalyptuswaeldi inegstande isch und 5 Minute vom Strand entfernt gsi isch. So sind mir denn s erscht Mol sit letschtem Mai wieder is Meer go bade!

Strand vo La Paloma

Sambataenzerin

Noch genau 2 Wuche in Uruguay isch es denn i ueses 10. Land gange: Brasilie! Puenktlich zum Carnaval sind mir det acho. Und will mir noed die einzige gsi sind, wo das Ereignis hend welle erlebe, sind mir denn anstatt noch 14 Stund Bus fahre, noch 23 Stund acho!
Im Bus hend mir s Gschwueschtertipaerli Dietrick und Marleen vo Holland kenneglernt und hend mit ihne fuer e gueti Wuche es Apartment uf de Insle Catarina teilt.

Die erschte Taeg sind mit Carnaval gfuellt gsi. Es het massehaft Luet uf de Insle gha und alli sind i Feschtlune gsi. Aber irgendwie isch es gar noed so eifach gsi ein richtig guete Alass z finde. Uberall isch chli was gloffe, aber das wo mir ues under Carnaval vorgstellt hend, ei Rieseparty, hend mir noed gfunde. So hend mir es paar wenigi, aber beidruckendi Carnavalwaege gseh, hend chli zu Maracatu tanzt, hend selbergmachte Caipirina trunke und es paar Sambaschuele bi ihrne Vorfuehrige bestunt.

Noch em Carnaval isch es denn einiges ruhig und vor allem guenstiger worde. So hend mir denn no fuer es paar Taeg die traumhaft brasiliansich Kueschte gnosse, obwohl s'Wetter nuemm ganz so schoen gsi isch wie die Taeg zuvor.

Uesen Husstrand

wunderschoeni grueni Kueschte

uesi neue Sunnebrillene

Noch all dem Fastfoode endlich mol was Gsunds!

de Kai :-)

Mit em Bus isch es denn no es allerletschts Mol noch Argentinie gange. Ueses letschi Highlight, d Iguazuwasserfaell, hend gwartet. Und was mir det gseh hend, het ues noed nur d Atem graubt, es het au uesi Erwartige bi wietem uebertroffe! Die Wasserfaell sind vor allem eis: unbeschrieblich schoen:

Avatar chan ipacke

de Regeboge isch denn fascht scho z viel gsi

das isch nur en chline Teil vom Ganze

Noch dem mir das Naturwunder gad zwei Taeg besichtiged hend, was eigentlich immer no zwenig isch, isch es denn zu uesere letschte Reisestation, Sao Paulo gange.
Do sind mir jetzt und zehled d Minute, bis endlich de allerletschti Teil startet: s Heifluege!!!

Bis bald also!

Kai und Manu

Freitag, 17. Februar 2012

Mir choemed hei!!

Under Traene hend mir huet, noch genau 500 Taeg reise und langem zoegere, s'Rueckflugticked bueched...I 3 Wuche isch es sowiet: noch 10 Laender, ca. 38'000 km mit em eigene Auto, etlichi mit em Bus, es paar tusig mit em Flugzueg, es paar verquetschti mit em Segelboot und paar wenigi,aber strengi z'Fuess, choemed mir nochere unbeschriebliche Reis wieder zrug. Es fallt ues noed liecht, de wunderschoeni Kontinent mit all dene fantastische Luet, wo mir do hend doerfe kennelerne, hinder ues z loh. Die ganze Idrueck und die neue Erfahrige werdet ues no lang begleite..
Aber fertig jetzt mit dem sentimentale Gequatsche! Denn mir freued ues unglaublich fescht druf, eu alli wieder z'gseh und eu wieder choene id Arme tschluesse! Endlich wieder richtige Chaes z'fuettere und mit eme Schuetzegarte abezspuehle :-)

Fuer alli wo ues wend go abhole cho:

Mir choemed am Samstig, 10 Maerz 2012 am morge am 9.15 Uhr in Zuerich a!

Alli Infos zu de "WELCOMEBACKPARTY" weiss de Raphael Stucki, do er jo sini Wett verlore het :-)
(Chasch es noed abstriete..So viel Chartene wie mir dir gschickt hend, do chonted mir gad nomel 3 Moenet reise ;-) !!)

Damit sich de Blogitrag au so wuerklich loht, blogged mir an bei s Bescht us 500 Taeg Mittel- und Suedamerika!!