Feliz nuevo ano

Koenigpinguine bi Onaisin

Noch Ushuaia sind mir sit langem wieder Richtig Norde gfahre. Im chilenische Teil vom Feuerland hend mir e Kolonie Koenigspinguine besichtiged. Bi perfektem Morgeliecht, ganz ellei und nur es paar Meter entfernt hend mir de Morgeschwatz choene mitverfolge. Die Eleganz und die Zuetraulichkeit vo dene Tier het ues echt beruehrt. Mir hend ues fascht nuemme choene losriesse vo ihne und sind nur ungern wieters gange.

Wieder uf argentinischem Bode hend mir ues in Rio Galegros uf eme sehr abglegne Camping es paar Taeg Ruhe vo de Fahrerei und dene Grenzuebergaeng goent. Die ganz Ziet dure hend mir Bsuech vome heftige Wind gha, dass er eim fascht scho gfhelt het, wenn er Mol fuer es paar Sekunde ufgoert het. 

 

Perito Moreno Gletscher

Wieters isch es denn noch El Calafate, wo unwiet vom Perito Moreno Gletscher isch. Mir sind sehr positiv ueberascht gsi vo dem Ort, dos u warm, windfrei und uf uesem Camping schoen leer gsi isch. Hend mir Luscht uf Gsellschaft, Internet oder es Bierli gha, hend mir nur es paar Minute muesse laufe, bis mir ide Tourizone gsi sind, wos alles gha het.

Isscholle

Mit em Auto isch es dur e schoene Gegend in Nationalpark Los Glacieres gange, wo de beruehmti Perito Moreno Gletscher stoht. Vo wietem isch eim die Dimension vo dem riese Chuehlschrank noed ganz bewusst, erscht wenn mer noecher ane goht oder es Boot vorne dure fahrt, merkt mer, wie riesig de blaui Is-Chlotz isch! En Rieselaerm hend die herabfallende Isstueck gmacht, es Gwitter isch echt en Scheiss degege.. Unwiet vom Gletscher hend mir denn uebernachtet und hend ihn die ganz Nacht chalbere ghoert! Am morge sind mir ihn denn nomel go bestune und hend ues so richtig satt gseh, bis es wieder zrug uf de Camping in El Calafate gange isch.. Det hend mir nomel broetlet was Fleisch her geh het und d Sunne gnosse..

Fitz Roy und Cerro Torre

Noch ere Wuche sind mir denn noch El Chalten, s Fitz Roy Massiv go besichtige. Scho vo wietem hend mir die scharfe Felsspitze gseh.. Je noecher mir aber ane gfahre sind, desto meh isch alles vom Nebel verhuelt worde. Nichts desto Trotz sind mir zwei Taeg det bliebe und sind die vielbetretne Wanderweg abgloffe. 

 

Nur de Fitz Roy

Voellig usem Huesli sind mir gsi, wo mir ueberaschend wieder uf uesi Pfusbuesler Didier und Barbara troffe sind, wo mir leider nur churz gseh hend, dos die zwei wieters zoge het. Fuer en churze Reiseustsch hets aber guet glanged. Danke fuer euri Tipps!

Ruta Cuarenta

Noch El Chalten isch es uf de Ruta National 40 Richtig Los Antiguos ade chilenische Grenze gange.. Noch noed allzulanger Ziet het ues de 40-Blues packt: begleitet vom nichtende wollende Gschaepper vo uesem Dodgie, uf uebler Stross verbi anere oede Landschaft isch es langsam vorwaerts gange. Zum Glueck het wenigstens s Wetter sich noed choene entscheide was wett und het ues mit Schnee, Sunne, Rege und Wind Abwechslig beschert :-)

Au Ruta cuarenta

Wiehnachtsapero

Langsam aber sicher isch Wiehnachte immer noecher gruckt und mir hend ues scho ganz ellei am Lago Buneos Aires Wiehnachte fiere gseh. De Wind het ues aber vo det wegtriebe, uf de Camping vo Los Antiguos. Det isch es o Wunder warm und fascht windstill gsi. Uf em Camping sind mir uf Uschi und Peter gstosse, wo mir vor fascht zwei Moenet uf de Peninsula Valdes kenneglernt hend. Gross isch d Freud gsi, wo au no de Peter und d Ursi zu ues gstosse sind, wo mir erscht vor es paar Taeg kenneglernt hend. Uesi Rundi isch dur de Manfred und d Rosita abgrundet worde, so dass Wiehnachte alles anderi wien en einsame Alass worde isch :-) 

Sogar mit Christbaum

 

Bi wunderschoenem Wetter hend mir scho am Nomittag afo fiere. D Uschi het e original Schwarzwaelderkirschtorte us de Buechs (!) spendiert und zum z 'Nacht hets denn Fondue Chinois geh. Fuer wiehnachtlichi Stimmig het de farbig luechtend Chrischtbaum vo Peter und Ursi gsorged, d Guetzli sind dur frischi Chriesi ersetzt worde, so dass nur no de Schnee  gfehlt het!

Chilenisch-Argentinische Lago

Uf chilenischem Bode hend mir denn d Caratera Austral in Agriff gno. Entlang am zweitgroeschte See vo Suedamerika, wo sich d Chilene und d Argentinier teiled, verbi a glasklare Fluess, beidruckende Berge und Gletscher! S einzig was noed so de Hit gsi isch, isch die Stross gsi, wo bi ues noed Mol de Name verdient het. 

Uf de Carratera Austral

Uf de Bootstour

Es Highlight isch denn e Bootstour in Puerto Rio Tranquilo gsi, wo mir d Catedral de marmol go bestune sind. Einehalb Stund sind mir uf em See gsi, hend s tuerkisblaui, chalti Wasser und die traumhaft schoene Marmorhoehle betrachtet und hend gad mol a die 100 Fotene gmacht.

                                                                                                                                

Catedral de Marmol

Puenktlich uf Silvester sind mir uf em Capming in Cerro Castillo acho. De chlini, ruhigi Ort isch umgeh vo hoche Berge und Gletscher und es schlaenglet sich au en Fluss dure.

Chilenisches Asado-Mhhhhh

En chline Teil vo de Familie

De Kai het am Silvesterobig scho s Fuer parat gha fuer ueses Silvesterbroetle, wo de Bsitzer vom Campingplatz zu ues cho isch und ues spontan as Familie-Asado iglade het. So hend mir de letscht Tag vomene unbeschrieblich schoene Johr i Gsellschaft vonere chilenische Grossfamilie verbrocht! A chruezfoermige Spiess sind zwei Schoefli vor em Fuer am brutzle gsi, uesi Becher sind nie leer worde, d Musig isch uf voller Lutstaerki gloffe und d Stimmig isch am afang no ziemli zrughaltend gsi. Nodis no sind d Luet uf ues zuecho und hend ues Froge zu uesere Reis, uesem Land und uesne Familie gstellt. S'Is isch definitiv um Mitternacht broche gsi, wo mir wie Familimitglieder vo allne in Arm gno worde sind und ues es guets Neus gwuenscht worde isch! Mit em neue Johr, isch denn au s Feschtesse los gange, wo fuer ues sehr ueberaschend noch ere halbe Stund scho wieder verbi gsi isch. D Tisch sind abgrumt und uf d Siete gschobe worde und d Musig verstaerkt durch neui Boxe nochli lueter :-) 

 

Warte ufs Tanzufgebot

Imene Halbchreis sind alli uf em Stuehl gsesse und hend gwartet. Es isch viel graucht worde und alli moegliche Getraenk sind igschenkt worde, bis denn die erschte Muetige Tanzflaechi betrete hend. Und ab denn hets keis Halte meh geh! Alli hend tanzt, de Opa mit de Enkelin, de Schwoger mit de Nichte, d Muetter mit em Sohn und z mitzt inne mir! Voellig ueberascht, wie schnell Ziet ume gange isch, sind mir am morge am halb sechsi als erschti (!) is Bett gange!

Jo, wenn da Johr so wieter goht, wies agfange het, hend mir gar nuet de gege izwende :-)

I dem Sinn:

Au eu ganz e guets neus Johr! Soelled Gsundheit uns Glueck eu begleite und wer weiss, viellicht fiered mir de neochscht Silvester jo zemme ;-)

Saludos de Chile

Kai und Manu