Al fin del mundo- Am Ende der Welt

Jep, mir hends gschafft! Noch 423 Taeg, 29860 km mit em eigne Auto, sind mir in Ushuaia, am Ende der Welt, uesem Zielort, acho! Tusigi vo Kilometer am Meer entland, dur Pamapas und Wueschti dure, ueber Paess, verbi a See, Vulkaen, Urwald wie au dur Rege, Schnee,Sunne und Wind...
 

Ushuaia-Fin del Mundo

Wie genau s'Ende vo de Welt usgseht, hend mir ues eigentlich nie gfroged. Aber irgendwie sind mir denn scho echli enttuescht gsi, wo mirs gseh hend. Ushuaia isch e voellig normali Stadt, d'Hueser passed noed immer so recht zemme, es het e Touristross wo mer alles bechunt, und Tourischte zum abwinke! Und es seged im Moment neod e Mol viel..Mir wend gar noed wuesse, wie das i paar Wuche do usgseht, aber bis denn, sind mir jo scho wieder uf em Rueckweg..

S'Wetter do une seg sit Wuche noed so guet gsi. Mir gnuessed warmi, sunnigi Taeg bi noed immer agnehmem Wind. Hell isch es bis fascht am elfi und d'Umgebig isch e Wucht! S'Meer isch vomene tuefe Dunkelblau, rundume hets Berge mit Schnee und d'Waelder sind dicht und es het Loewezah und Gaensebluemli..Wiehnachtsgfuehl? Hend mir ueberhaupt keini, obwohl mir vor es paar Taeg versuecht hend Mailaenderli ide Brotpfaanne zmache :-)

De rauchend Vulkan Puyehue

Noch uesem Ufenthalt in Pucon hets ues wieters zoche. Mit frische Energie isch es zerscht durch Seegebiet vo Chile, aschluessend durch das vo Argentinie. Do de Vulkan uf de chilenische Siete immer no Vollgas git, chan mer im Moment „d'Ruta de los siete lagos“ vergesse.

D'Vulkanaesche isch ueberall gsi

                                                                  Mir hends glich noed choene sie lo und sind trotzdem dri gfahre. Am afang het mer d'Schoenheit vo dere Gegend no guet gseh. Glasklari See i wunderschoene Blautoen, umgeh vo Wald und Berge. Wenn noed e dicki, graui Aescheschicht am Rand gsi waer, hets fascht normal usgseh. 

Je me mir aber ine gfahre sind, umso dunkler und grauer isch es worde. Au im Auto ine isch alles voll Aesche gsi, und das obwohl alli Fenschter zue gsi sind..Mer cha nur hoffe, dass de Vulkan scho gli Ruhe git und die Gegend sich scho bald wieder wie en Phoenix us de Esche erhebt.

Traumhafte Gratisstellplatz

Noch dem churze Usflug id Eschegegend sind mir wieters, a Bariloche verbi, noch El Bolson. De erscht Blick isch eher chli ernuechternd gsi, under eme „Hippiort“ hend mir ues echli was anders vorgstellt. Aber alli Skepsis isch sofort verfloge, wo mir de legendaer Samstigmarkt gfunde hend. Stand a Stand hets sich im Park anenand greiht. Jede Stand het anderi, kreativi Artesania gha. Es Paradis fuer d'Manu!! Und alli wo mich kenned choend sich jo vorstelle was passiert isch: Mini Taesche het sich nodisno gfuellt, werend em Kai sis Portemonnaie stehtig a Inhalt verlore het :-) Viva la Artesania!!! Ich muess emel sicher nomel a de Ort zrug!

Beschwingt,oder ernuechtered?, vo dem coole Markt isch es denn direct zu de Peninsula Valdes gange. Uf kein Fall hend mir d'Wale welle verpasse! Die erscht Nacht nochere lange Fahrt hend mir in Puerto Madryn uebernachtet. Det sind mir au wieder uf Nici und Marco gstosse. Vo ihne hend mir denn au erfahre, dass mir nonig zu spot sind fuer die Riesesaeuger und dass no u viel det seged. Mit ere Gwaltserwartig sind mir am noechschte Tag also los. Dur die karg Buschlandschaft dure, verbi am Campingplatz, direkt as Meer. Und: nuet! Kein einzige Wal hend mir gseh..Und es isch jo noed so, dass die Tierli so chli sind. Ich mein es Baby isch jo 4 m lang!

Am andere Tag sind mir go Whale-Watching mache. Jo, und denn hend mirs gseh: massehaft,riesig, genau vor ues, nebed ues, under ues! Am Springe, Schwanzflosse usehebe, Wasserfontaene useputsche und mit em Nochwuchs spiele! Viel zu schnell isch s'Boot wieder zrug..

Zrug a Land hend mit d'Bakanntschaft mit em Didier und de Barbara, es jungs Paerli us Friburg, gmacht. Zaemme sind mir zume Strand gfahre, wo mer d'Wale direkt vom Ufer us gseh het. Tagelang hend mir ihne bim Spiele und Plantsche zueglueged und sind voll us em Huesli gsi, wenns bis 10 m neoch as Ufer cho sind! 

 

Turtelndi Seeloewe

Noch es paar Taeg hend mir ues fascht scho muesse losriesse vo dem Ort, um die restlich Insle z'besichtige. In Punta Norte sind mir uf d'Seeloewe und d'Seeelefante gstosse. Leider hets e Absperri gha und mer hets nur wo wietem choene bestunde. Do aber gad d'Fluet cho isch, und die Fulenzer lieber im Trochne lieged, hets es vorzue i uesi Richtig triebe :-)

1. Reihe fuer Orcabeobachtig

Echli enttuescht sind mir denn glich gsi, will mir ghofft hend, dass mir zu dene Glueckliche zehled, wo in Punta Norte en Orca gsehnd. Dos aber nonig Orcasaison gsi isch, und mer au denn nur mit viel Warte oder brutalem Glueck ein gseht, isch das scho echli zviel verlangt gsi.. Mir sind denn wieters Richtig Pinguine gfahre und hend underwegs amene Meeresarm e Mittagspause igleit..I Reih und Glied sitzend, im Windschutz vom Pfusbus vo Didier und Barbara, hend mir nichtsahnend mitenand plaudered. Und uf eimol: Orcas! Noed ein, nei, gad drue! Mir hends fascht noed choene glaube, wo die zwei Orcas mit Baby am andere Ufer a Land gange sind und gjagt hend!

Kamarascheui Orcas

Magellan-Pinguin

Kreischende Magellan-Pinguin

Mir hend gwartet, bis die drue wieder us em Meeresarm useschwimmed und sind denn wieters zu de Pinguine. Die sind im Moment gad am bruehte und mached en Rieselaerm, wenns denand abloesed. Es isch faszinierend gsi zum luege, wie ihri Hoehle usgsehnd, wies umewatschled und gar nuemme herzig usgehnd, wenns afanged umehepe!

                                                                                                                                      

Jo, und denn sind d Orcas wieder cho. E Riesetempo hends druf gha. D Ebbe isch im Amarsch gsi. Schnell sind mir is Auto gsprunge und sind wieters zum 3. Ussichtspunkt, ide Hoffnig, schneller zsie als die drue.. Um s Jahrundertfoto z'schuesse het de Kai s' Gsetzt Nr. 4722 broche und isch under em Hag dure. Nur 2 m vor ihm entfernt sinds gsi..Aber irgendwie sind die Jungs kamerascheuh, denn uftauche hends leider noed welle..Macht nuet, sie hend trotzdem maechtig Idruck gmacht bi ues..

Nochdem mir no Stausse us noechschter Noechi gseh hend, wie au e Guerteltier und irgendwelchi Huehner, sind mir fix und fertig zrug zu uesem Stellplatz bi de Wale. Die vielne Idrueck hend zerscht Mol muesse verarbeitet werde. Jo, und als ob d'Wale gwuesst hettet, dass mir gli wieters goend, hends ues es Abschiedskonzert verpasst, wo mir glaub nie vergesse werdet..

Stellplatz direkt am Meer

Gmeinsam mit uesne Pfusbusfruende sind mir denn am Meer entlang wieters Richtig Pinguinkolonie in Camarones. Underwegs hend mir superschoeni Plaetzli am Meer gfunde zum wild stoh. Am einte Ort hend mir amene Seeelefantepaerli ide Flitterwuche choene zueluege..D Pinguinkolonie isch echli chliner gsi wie die in Punta Tombo, wos e halbi Million het. Aber au eusi het mehreri Tuusig gha. Die einte hend sich erholt vom Fische, anderi hend bruehtet, wieder anderi sind as Meer gwatschlet und es paar hend au gstrittet..Jo, und bi es paar wenige het mer id Hoehli ine gseh und en churze Blick uf de scho gschluepfti Nochwuchs choene werfe. 

 

1000igi Kilometer durch Pampa dure

Noch eme glungne Abschlussobig mit Didier und Barbara isch es denn fuer de Kai und mich ellei wieters gange. Volle Kraft voraus noch Ushuaia isch s'Motto gsi. Dunne sie, bevor alli Touris det sind, isch de Atrieb gsi. 

Jo, und do sind mir jetzt. Ide noechschte Taeg werdet mir de Nationalpark go besichtige und hoffed, dass s'Wetter mag anhebe. Denn do une chan sich das jo fascht sekuendlich aendere.. Aber viellicht denkt jo de Samichlaus au a ues und beschehrt ues mit viel Sunne! 

 

Tierra del Fuego

I dem Sinn: Ganz e besinnlichi Wiehnachtsziet, gnuessed die gmuetlich Ziet ide Stube und fuetterd Guetzli bis zum Platze!

Hebeds guet und bis zum noechschte Mol

Kai und Manu
 
PS: Danke a alli Leser!!! De Blog isch vor churzem zum 4000igschte mol aklickt worde!!!

Argentinien, Chile :-)

Wieguet Colome

Jo, mir hend ues denn irgendwenn vo Cachi choene loese und sind wieters noch Colome, wo mir es Wieguet sind go aluege und natuerlich au degustiert hend. A dem Ort befindet sich s'hoechtschtglegeni Rebbeabaugebiet vo de Welt und de Wie isch voll oekologisch, was mer am Pris au agmerkt het. Au uf dem Areal stoht es Lichtmuseum, wo mer gratis doerf besichtige. Gstaltet worde isch das ganzi vom amerikanische Kuenstler James Tarrell und es git Weltwiet nur drue Musee, eis ide USA, eis in Afrika und us irgendeim Grund i de "Pampa" vo Argentinie :-)

Unterwegs noch Cafayate

 Wieters isch es noch Cafayate, en guete Usgangspunkt zum wandere und Sache besichtige. Unwiet vo dem turistische Doerfli het mer es Amphitheater, de Teufelsschlund, Fenster im Fels und es "Papageiehus" (en Fels mit viel Loecher wo es staendigs cho und go gsi isch) choene besichtige. De argentinisch Fruehlig isch i voller Blueti gsi und das bi Temperature, wo uesem Summer entsprechet.

Garganta del Diabolo

Amphitheater

Casa de Loros

Los Castillos

Talampaya

 Langsam aber sicher hend mir denn Richtig Suede muesse. De Nationalpark Talampaya isch s'noechscht Ziel gsi. Vo andere Reisende hend mirs Itrittsticket gerbt, so dass mir "nur" no d'Tour hend muesse zahle. De grossi, knallroti Fels mit sinere Schlucht und de kuriose Steifigure isch sin Pris Wert gsi, gratis debi isch au de Gruppeklugscheisser gsi, wo sogar alles no besser als de Guide gwuesst het. Nerv!!!!

Talampaya

 

San Antonio de Valle Fertil

Imene chline Doerfli, wos meh Cabanas gha het als Iwohner, hend mir denn es paar Taeg ues vo de vielne Kilometer erholt. Mir sind elllei uf em Camping gsi, bis es quitschgaels Auto anegfahre isch. D'Wohrschindlichkeit isch relativ hoch gsi, dass es Schwitzer sind, nur die argentinisch Nummere isch verwirrend gsi. Wos ues denn aber im klarschte Schwitzerduetsch begruesst hend, isch de Fall klar gsi. Zemme mit em Maek und de Carin und ihrem Sohn em Noe hend mir am Obig amel fein broetlet und chli gschnaederet.



Im gliche Dorf hend mir de Mario troffe, en Argentinier wo fuer 3 Moenet in Duetschland gsi isch und drum chli Duetsch het choene. Er het so Freud gha, dass er sis Duetsch het choene usgrabe, dass er ues spontan e Tangostund offeriert het. De Pris isch gsi, dass mir mit ihm numme Duetsch redet. Mit eme mulmige Gfuehl sind mir, puenktlich wie mir halt sind, am obig am 10ni am Treffpunkt gsi. Wiet und breit kei anderi Taenzer und vo Tango isch au kein Ton z'ghoere gsi. Mir hend scho welle umchehre, wo uf eimol de Mario pickfein useputzt vor ues stoht. Jetzt hend mir nur no muesse uf sini Partnerin und die andere Taenzer warte. Die sind denn au nodisnoh cho. S'ganz het denn so usgseh, dass de Kai und ich hend doerfe "tanze" und alli andere hend zueglueged. Es sind immer meh Luet cho und sogar vor de Tuere sinds fascht scho Schlange gstande um ues zuezluege. Und das ganz bestimmt noed wills so uesserscht elegant usgseh het!!! Wo denn de Hoehepunkt vo de Peinlichkeit erreicht gsi isch, isch die Stund au scho wieder umgsi. Mir hoffed de Mario heg meh Duetsch glernt wie mir Tango :-)

Kai in "Australien"

Noch dem mir denn de noechscht Nationalpark "Sierra de las Quijadas" besichtiged hend, sind mir noch Mendoza gange, enere schoene Stadt und eme Hammercamping echli usserhalb. Mir sind denn gad es paar Taegli det bliebe, wo mir mit em Victor, eme oeppe 50-joehrige Argentinier, wo mit drue junge Amerikanierine underwegs gsi isch, e gueti Ziet verbrocht hend.

7 Jahre in Tibet

Vo Uspallata us, idere Gegend isch 7 Jahre in Tibet dreiht worde, isch es noch Chile uebere. Nocheme extrem muehsame Grenzuebergang hend mir das tueri Land denn au erreicht.

Noch eimol uebernachte sind mir denn au gad go d'Hauptstadt Santiago besichtige, wo vor allem riesig gsi isch abor nuet bsunders! Am Tag druf isch es sit langem wiedermol as Meer gange und mir hend sogar traumhafts Wetter gha! S'Wasser isch aber so sauchalt gsi, dass mer hoechschtens en Zeche ineghebet hend (also de Kai).

Valparaiso

No am gliche Tag hend mir d'Kuestestadt Valparaiso besichtiged. Vo dere Stadt hend ues scho paar Luet vorgschwaermt und Unesco Weltkulturerbe isch sie jo au. Mir hend ues vor allem eis gfroged: Wieso eigentlich? Irgendwenn hend mir denn gschnallt, dass mer mit so Lift i anderi Viertel, wo oberhalb lieged ( d'Stadt isch an Berge ane baue), chan go. Det obe het die ganz Sach gad chli andersch usgseh. Farbigi Hueser und viel bunti Wend hend ues det begruesst. Es het echli usgseh wie es Pipi Langstrumpfstaedtli mit einere Villa Kunterbunt ade andere.


Gsettiged vo so viel Staedt sind mir denn zrug noch Laguna Verde, wo uesen traumhaftschoene Camping gsi isch. Imitte vo bluehende Kamille, Olivebaeum und ere Meute Huend hend mir ues vo dere Abgasueberdosis erholt.

Vo Unterwegs

Uf einmol hend mir die tickend Uhr im Nacke gspuehrt, mit hend jo "nur" no 3 Moenet s'Auto bis mirs verchauefed und wend no soooo viel gseh! I eim grosse Schub sind mir noch Pucon gfahre, wo mir Marco und Nici wieder troffe hend. Sie hend det fuer e Ziet choene es Huesli i traumhafter Lag ueberneh. S'Wiederseh isch mit broetle und eme Wieli gfiered worde. Es isch echt schoen gsi, sie noch ueber 2 Moenet wieder zgseh.

Uesi Ussicht

Mir hend denn Gunscht vo de Minute packt und sind so d'Nochfolger vo Nici und Marco worde und gnuesseds jetzt wiedermol ime Huus doerfe zwohne, wos immer warm Wasser und e richtigi Chuchi mit Backofe het, en Vulkan wot d'Ussicht schmueckt und Roessli ums Huus ume galoppiered.









Noch dene Taeg, werdet mir denn aber bereits scho bald wieder noch Argentinie goh. Leider aescheret det de eint Vulkan vo neuem ume, so dass mir ziemlich sicher en grosse Teil vom schoene Seegebiet choend striche. Aschluessend gohts den aber volles Tempo zur Peninsula Valdes, wo d'Wale wartet...!

Viva la Sudamerica!!

Saludos


Kai und Manu

PS: Jetzt hend mir gad weg Sekunde e Pferedegeburt verpasst. Die letschte paar Minute hend mir demit verbrocht zum zueluege, wies Fohle sini erschte Schritt gmacht het..

Chile, Argentina!!!

Jo, mir glaubeds selber noed, dass mir scho in Argentinie acho sind. Uf eimol isch es u schnell gange, und das Land wo am wietischte weg gsi isch, is uf eimol do. Theoetisch sind mir jetzt i uesem letschte Land acho, praktisch gseht das echli andersch us *g*

Uf em Salar de Uyuni

Noch Sucre isch es schnellscht moeglich uf de Salar de Uyuni gange. Leider sind mir i uesem Tempo vom Fuessgaengersunntig gstopped worde, wo natuerlich genau denn het muesse si. So hend mir denn en halbe Tag und e Nacht binere Tankstell verbrocht und das, obwohl mir de Salar vor de Nase gha hend.

                                                                                                                                                                Am andere Tag hend mir denn endlich wiesse Grund betrete! Mit eme argentinische Paerli, wo mit drue Huend umereist, sind mir uebers Salz bretteret. Dos so schoen gsi isch, hend mir zwei Naecht uf em Salar uebernachtet. I de erschte Nacht het de eint Hund vo de Argentinier gjuenglet. Ganzi 11 Welpe sind uf d Welt cho!! Jetzt reiseds mit 13 Huend, eis isch gstorbe, wieters!

Zugfriedhof bei Uyuni

Hexenmarkt in La Paz

Mir hend denn noch La Paz zrueg muesse, wo mir denn endlich e neui Frontschibe becho hend. Obwohl sie uf Mass agfertiged worde isch, isch sie ein Zentimeter z churz gsi. Aber was noed passend isch, wird do passend gmacht :-)

                                                                                                                                                                               Noch 6 Wuche Bolivie hend mir denn chilenische Bode betrete. Mir sind durch drue wunderschoene Nationalpaerk duregfahre, wo mir massehaft Vicunas, ca. 500 (!)Flamingos, Strausse und jenschti Voegel gseh hend. Dezue ane isch die ganz Umgebig (rauchigi Vulkaen, schneebedeckti Berge, chlini Salzsee und e traumhafti Thermalquelle) dezue cho. De kroenig vom ganze isch gsi, dass mir i dene drue Taeg so guet wie kein andere Turischt gseh hend. 

Lauca Nationalpark

Vicuna Nationalpark

Humberstone-Geischtorstadt

Wieters isch es denn de Kueschte entlang Richtig San Pedro de Atacama, e sehr turistischi Oase. Mir hend a dem uebertuerte Ort zwei Naecht verbrocht und sind i de einte Nacht mit ere Tour go Sterne betrachte, was es sehr beidruckends Erlebnis gsi isch.

                                                                                                                                                                         Ueber de wunderschoeni Paso de Jama isch es denn noch 10 Taeg Chile noch Argentinie gange!Argentinie isch fuer ues beidi, nebscht Kolumbie, das Land gsi, wo ues am meischte greizt het. Und bis jetzt sind mir i keinschter Wies enttuescht worde: d Natur isch gewaltig, de Fruehlig isch gad i voller Blueti, ide Stadt Salta hets hufewies Restaurants wo viel chlini Tischli dusse hend (was ide obere Laender jo e Selteheit isch) und mir sind gescht scho zu uesere erschte Parilla iglade worde :-) Mit superfeinem argentinischem Fleisch und Wie! S einzig wo ues nochli Muehe bereitet isch die argentinisch Ussproch, aber au das wird sich sicherlich no aendere, denn d Argentinier sind so offe, dass mer ums Rede gar noed umechunt :-)

Paso Jama

Salta - Die Schoene

                                                                                                                                                               Vieli fruehligshafti Gruess us Argentinie!

Hebed d Ohre stief und gnuessed de Herbscht!

Kai und Manu

Bolivia, Bolivia!

Jo, es schient fascht unglaublich, aber au mir hends mol no us Peru usegschafft :-) Sit vier Wuche sind mir jetzt scho in Bolivie und hend so einiges erlebt:

Lago Titicaca bi Bolivien

Ziemli entuescht vo de schwimmende Insle uf em Titicacasee, was mir als die volli Turiabzocke erlebt hend, sind mir moeglichscht schnell Richtig Grenze gange, do ueses Visum langsam aber sicher abgloffe isch. Mir hend en Hammertag verwuetscht, denn a de Grenze hend sich d Autos nur so tummlet. Gad uf de andere Siete vo de Grenze,bi Cobacabana, hets e riese Fescht geh und so ziemli alles het a das Fescht welle.





Nochdem die Grenzformalitaete extrem schnell erlediget gsi sind, hend mir uesen urspruengliche Plan, es paar Taeg in Cobacabana am Titicacaseeufer z'stoh, weg de Menschemasse platze loh und hend ues noch La Paz ufgmacht. Do mir ues am Vorobig vom Nationalfiertig i die Stadt begeh hend, sind mir volle Kanne im Stau stecke bliebe. Bi totaler Dunkelheit sind mir im Hotel Oberland acho, wobi mir das Dank em GPS vo Nici und Marco (s'einte Machu Picchu Paerli) gfunde hend. La Paz het ues wegghaue!

La Paz....!!!!

Die Stadt isch gewaltig! Sie isch ufere Hoechi vo 3200m bis 4100m. Wenn mer vo obe abe ide Chessel lueged, gseht mer so wiets Aug reicht roetlichi Hueser und im Hindergrund schneebedeckti Berge! Do mir scho guet aklimatisiert gsi sind, het ues d'Hoechi au nuet usgmacht.

Die "sogenannti" Todesstrecki

Uesem Auto hend mir e Pause goennt und hends im Hotel Oberland stoh loh. Mit em Bike sind mir denn die beruehmti Todesstrecki abegfahre und hend i drue Stund 3,6 Hoehekilometer hinder ues brocht. Agfange het das Ganze bi ziemlich frische Temperature, was sich aber sehr schnell gaenderet het. Immer meh Chleidigsstueck sind weg cho, so dass mir am Schluss im T-shirt und voellig verschwitzt bi Coroico acho sind.

Ussicht uf "Todesstrecki" vo uesem Hot

Zwei Taeg hend mir ues  im wunderschoen glaegene Hotel "Sol y Luna" erholt. Denn sind mir mit em Bus i 15 Stund noch Rurrenabaque gfahre, wo mir en Dschungeltripp (Amazonas) bueched hend. Mit em Boot isch es wegem tuefe Wasserstand anstatt i 6, i guet 8 Stund de Fluss ufe gange.

Uf em Weg tuef in Dschungel inne

A uesem Platz acho hend mir Wanderige dur de Dschungel gmacht, hend probiert es paar Tier z'gseh, was au ab und zue klapped het, und sind go fische. Nochdem de Kai und ich je zwei Riesefisch usegholt hend, drue Piranias und ein Catfisch, hend mir denn gnueg fuer de z'Nacht und de z'Mittag fuer die ganz Gruppe gha. De Fisch hend mir einmol i Blaetter igwicklet und eimol i Bambus broetlet gaesse, was sehr ungwohnt aber super fein gsi isch.

Wildlife

D'Fahrt noch Sucre

Zrug in Rurrenabaque hend mir de Bus zrug noch La Paz gno, wo nebscht uesem Auto s'ander Schwitzerpaerli vom Machu Picchu uf ues gwartet het. Zemme hend mir ues denn au uf de Weg Richtig Potosi gmacht, wo mir urspreunglich de Mine hend welle en Bsuech abstatte. I dere noed gad schoene Stadt hend mir ues Dank em sehr schlechte GPS "Manu", heillos verfahre und hend au mit Hilf vomene Taxifahrer noch em Abklappere vo allne moegliche Hotels mit Parkplatz nur mit Mueh und Not was fuer d'Nacht gfunde. Am noechschte Tag hend mir nur no use welle us dere Stadt. Underwegs noch Sucre, de Hauptstadt vo Bolivie, hend mir denn au unfreiwillig e Pause muesse mache, do gad es Autorenne dure isch.

Sucre

Wo mir denn i dere Stadt acho sind, sind mir gad chli blendet gsi vo ihrere Schoenheit: wiessi, wunderschoeni, alti Hueser mit Balkoenli und Boege hend ues erwartet. Dezue es Klima, wo so richtig perfekt isch. Es isch noed zu heiss, noed zu kalt  und mer chan wunderschoen dusse sitze am Obig. De Traum isch perfekt gsi, wo mir i de Stadtmitti imene chline Gaertli en Platz gfunde hend. Bsitzer hend de "Campingplatz" erscht gad eroeffnet und sind sehr bestrebt, alles moeglichscht guet fuer ihri Traveller izrichte.

Jo, und do sind mir jetzt und gnuessed de Superplatz i volle Zueg. Am Obig broetlet mir mit em andere Schwitzerpaerli, sitzed lang dusse und werdet am Morge vo de Sunne gweckt. S'einzig Problem bestoht do drin, dass mir  a dem Traumplatz noed verhocked und au wiedermol wieter goend :-)





I dem Fall bis zum noechschte Mol!

Saludos

Kai und Manu

Matsch u Pitschu

Huancachina Oase

Nochdem ueses Auto wieder wunderschoen gschaltet het, sind mir uf em direktischte Weg us Lima use. Je meh s Richtig Berge gange isch, um so besser isch s Wetter worde. De Weg het ues a de bekannte Oase Huancachina verbi gfuehrt, ade raetselhafte Linie vo Nasca, wie au a wunderschoene Sand- und Berglandschafte.

Uf em Weg id Ande

Cusco

Wo mir denn in Cusco acho sind, hend mir gmerkt, dass es uf em Camping nur so vo Franzose und Schwitzer wimmlet. Mir hend denn au zum erschte Mol uf uesere Reis anderi jungi Schwitzerpaerli troffe,wo mit ihrem eigne Auto underwegs sind. Und will die zwei Paerli so zwaeg gsi sind, hend mir ues ihne bim Machu Picchu Tripp agschlosse.








Gmeinsam isch es ueber Ollantatambo noch Santa Theresa gange, wo mir ueses Auto stoh lo hend. Am andere Tag isch es z Fuess noch Aguas Calientes gange, wo mir im Hotel uebernachtet hend, so dass mer am andere Tag mit eim vo de erschte Bues ufe zum Machu Picchu hend choene. Voller Spannig sind mir i die Ruinestadt ine und hend ues am Ussichtspunkt ufgsteltt. Leider hend mir abgseh vonere wiesse Nebelwand nuet gseh...

Nebelwald bi Machu Picchu

Wo denn auno de Rege igsetzt het fuer die noechschte Stunde, isch denn Matsch u Pitschu perfekt gsi. Mit chli Glueck hend mir denn de Wainapichu mit de zweite Gruppe doerfe bestiege, obwohl mir Tickets fuer die erscht Gruppe gha hend. Obe am Berg acho, hend mir en churze Moment d Ruine vo obe choene bewundere bevor de Nebel sie wieder verschluckt het.

Machu Picchu

Wo mir une wieder acho sind, het sich de Nebel afo liechte und mir hend glich no die ganz Ruine choene in Augeschieh neh.










So hend mir denn de Bus noch Aguas Calienes gno und sind bi Sunneschie wieder zrug noch Santa Teresa marschiert. Denn churz nochdem mir de Machu Picchu verloh hend, het sich de Nebel verzoge, de Rege het ghoert und d Sunne het sich vo de beschte Siete zeiget..

Campingplatz oberhalb Cusco zwueschet Lamas und Huehner

 Zrug in Cusco hend mir no es paar Taeg vom schoene Campingplatz profitiert, wo chli userhalb vo dere sehr turistische, aber wunderschoene Satdt gsi isch.










Ueber sehr schlechti Strosse isch es Richtig Colcacanyon gange. De erscht Stopp hets in Chivay geh, wo mir ues es Bad i de heisse Quelle goent hend. Vo det us isch es en Chatzesprung is Cruz del Condor gsi. Mir hend dete uebernachtet und hend ues vor de ganze Turimassene en super Platz ade Ussichtsplattform choene sichere, wo mir de Kondore bim Fluege us noechscher Noechi hend choene zueluege.

Condor mir ere Spannwitti vo 2.5 - 3m

Uf em Weg noch Arequipa, Vulkan el Misti 5822m

Jo, und jetzt sind mir in Arequipa acho. Vorussichtlich bliebed mir no es paar Taeg do und mached ues denn ueber de Titicacasee uf noch Bolivie, was denn ueses sechsti Land sie wird.

Kloster Santa Catalina

Eu en ganz schoene erschte Auguscht! Loend eu noed verregne und essed au chli Schwitzerchoscht fuer ues mit!


Saludos de Peru

Kai und Manu