Gracias Colombia!

Noch zwei unvergessliche Moenet sind mir vor es paar Taeg in Otavalo, Equador, acho.
Mit uesem Auto und uesem Fruend em Oli hend mir i Kolumbie insgesammt 3200 km zruggleiht. Vo ueberfullte Straend, riesige Berge, chuehle Naecht uf ueber 3000m, nette Mensche und kulinarische Koeschtlichkeite hend mir i dem gewaltige Land alles gha. Zueverlaessig (mit es paar Usnahme) het ues ueses Auto vo eim Ort zum andere brocht. Dank uesem Dodge sind mir mit vielne, a uesem Auto sehr interessierte Kolumbianer is Gsproech cho und hend so uesi Spanischkenntnis enorm choene verbessere.
Aber am meischte Beidruckt hend ues Kolumbianer selber. Mir sind no nie amene so fruendliche, hilfsbereite und herzliche Volk begegnet. Vor allem ei Begegnig het ues bsunders beidruckt.
E chlieses Gschichtli:

Kirche von Giron

Mir hend mit uesem Auto die erscht laenger Strecki zruggleit. Wa in Kolumbie schnell mol moeglich isch binere Landesflaechi vo Spanie, Frankrich und Portugal. Alli Tips hend mir beruecksichtigt,  hend aber noed mit em Verkehr grechnet und sind voll bim Idunkle im Stau stecke blibe, und das usgrechnet vorere grosse Stadt. Mir hend ues de Kopf zerbroche, wie mer do wieder usechoemed.. De Kai isch denn usgstiege und scho isch er miteme, vo uesem Auto aglockte, Kolumbianer im Gsproech gsi. Wo er denn erfahre het, dass mir e kei Ueber-nachtigs-moeglichkeit hend, het er ues spontan zu sich und sinere Familie iglade. Er het gmeint, es segi noed wiet und er fahre ues vorus. Was noed wiet isch fuer kolumbianischi Verhaeltnis hend mir denn schnell gmerkt. Noch zwei Stund sind mir mued und dreckig bim Duvan dehei acho. Sini Frau d Maria isch extra fuer ues go ichaufe und het ues no bechocht. Nocheme Bier sind mir alli im 14 Quadratmeter grosse Schlofzimmer go schlofe, do er noed het welle, dass mir im Auto uebernachtet. Die ganz Familie, de Duvan, d Maria und ihri zwei Chind, hend i eim Bett gschlofe,
de Kai und ich hend ues is Chinderbett quetscht und de Oli het am Bode
ufere
Matratze vom Auto uebernachtet.

Von B´manga nach San Gil

Uesi Uebernachtigsiladig het sich uf zwei wieteri Naecht und Taeg usdehnt. Die Ziet het en Coiffeurbsuech vom Oli beinhaltet, e Stadtfuehrig, e Mani-und pedikuer fuer d Manu und e naechtlichi Tanzstund fuer alli. Damit ues is sim Land au wuerkli nuet passiert, het ues de Duvan die reschtlich Ziet mit Telefonaruef und Tipps begleitet, wo ues sicherlich fehle werdet!

Villa de Leyva

Noch wietere unvergesliche Erlebnis idem Land hend mir denn mit schwerem Herze uesen Fruend de Oli in Medellin verabschiedet. Mir hoffed, er isch guet im noechschte Land acho, wenn mir au noed mit Sicherheit wuessed wo das isch. Meld di mol Oli!



Au mir werdet ues ide noechschte Ziet wiedermol melde!

I dem Fall

Saludos de Equador y hasta luego!

Kai und Manu

PS: D Foeteli werdet i de noechschte Taeg drufglade (scheiss Internetverbindig..)

Wer inspirierte wen???

Reisefeeling

Irgendowo in Kolumbien

Stellplatz

Las Lajas zum zweite

Wasserfall :-)

Raquira