Stellplatz bi de Laguna Paca |
Effiziente Studentestreik! |
Wieters isch es wortwoertlich ueber Stock und Stein bis mir denn endlich d Lagune erreicht hend. Do hend mir denn schnell muesse feschtstelle: wo's e Stross het, hets au es Huus.. Wildcampe am See, i de volle Natur weg vo de Zivilisation, i dere Region unmoeglich..Und drum isch es am noechschte Tag gad wierts gange, a Alpacaherdene verbi, uf ueber 5000m, zwuesched riese Berge und Schneefelder Richtig Ayacucho..
Eini vo dene guete Strossene in Peru... |
Schneeballschlacht uf 5000m! |
Aber au in Aycucho hend mir abgseh vo viel Polizei
nuet gfunde, wo mir hetted choene bliebe. Mir sind i 2 Stund ganzi 6 Mol vo de Polizei aghalte worde..Teilwies nur, wills ueses Auto hend welle aluege..Mir sind denn i de Noechi vo Ayacucho glandet. Und will mir nuet Sichers zum Uebernachte gfunde hend, hend mir gad vor de Polizeistation uebernachtet. Am noechschte Tag sind mir s Chriegsdenkmol und d Wariruine go besichtige. D Warikultur isch no aelter als d Inkakultur, isch aber ebefalls scho sehr entwicklet gsi.
Chriegsdenkmol in Chinua |
Wari Ruine |
Schneller als mir denkt hend, sind mir in Andahuaylas acho, wo mir ues es paar Taeg Erholig im Hotel goennt hend. I dere Ziet hets i dem Staedtli es Volklorefescht geh, wo mir mit Interesse mitverfolgt hend.
Folklorefescht |
Mir hend denn vor gha, ziemlich i eim Rutsch noch Cusco z'reise und de beruehmt Machu Picchu z besichtige. Wo mir aber in Abancay (vier Stund vor Cusco), wieder uf asphaltierti Strosse cho sind, hend mir gmerkt, dass bi uesem Magic Bus d Automatik nueme tuet. (Also de Charre nueme schaltet. Es isch jo en Automat.)
Nochere erfolglose Wuche in Abancay, hend mir denn alles wieder zrug noch Lima muesse (17 Stund), dos nur in Lima Ersatzteil und Spezialischte git. Jo, und do sind mir jetzt, scho wieder, und wartet uf ueses Auto, wo i es paar Minute soetti abfahrbereit si.
Und denn heissts: Tschau, tschau Lima! Uf hoffentlich nieme wiederseh!
Bis bald!
Kai und Manu